quinta-feira, 25 de março de 2010

Exposiçom


A exposiçom de AMC com motivo do Centenário do 8 de Março acha-se agora em Ponte Areias no café-bar Onde Sempre na rua Redondela.
Estará nesta ubicaçom um par de semanas. Imos reproduzir no nosso blogue todas as entrevistas e para começar Ana Vicente Amoedo.






- Conheces na sua totalidade todas as condiçons que se estipulam no teu contrato:

Conheço. Desde os inícios, nas distintas empresas em que trabalhei tentei sempre conhecer a fundo todas as condiçons estipuladas nos contratos, lendo mesmo até a letra pequena.
- Tipo de trabalho que realizas.

Eu, como todas as companheiras, passei por todos os empregos distribuindo-nos a todas em turmas; serrar, embalar… Excluindo as tarefas administrativas.

- É um trabalho realizado só por mulheres?

Nom teria porque ser assim, mas nesta empresa somos quase todas mulheres. Há homens, mas nom fam o trabalho que fazemos as demais, os homens som os encarregados, os chefes, etc.

- Achas os horários e turmas ajeitados para conciliar a tua vida laboral e familiar, sendo mae de três nenas?

Nom. Ter que mudar de turmas por semana fai muito mais difícil conciliar a vida laboral e familiar. Mas também o meu corpo de algumha maneira o nota, ao ter que adaptar-se a horários diferentes; cansanço tanto fisico como psicologicamente. Com três crianças ainda é mais complicado. A empresa nom pom nengum tipo de meios para poder conjugar a vida familiar e laboral, como um serviço de infantário ou como poder escolher o horário mais ajeitado à tua situaçom.

- Achas melhoráveis as vossas condiçons laborais? Por quê convénio vos regedes?
As condiçons sempre som melhoráveis, há muitas situaçons intoleráveis para desenvolver o nosso trabalho em condiçons óptimas. O convénio que possuímos é um convénio assinado por UGT e CCOO e estamos tratando de mudá-lo e adapta-lo às nossas necessidades e nom às dos patrons.

- És Sindicalista. Achas necessário este trabalho adicional, além do que já tés?

Acho o meu trabalho como sindicalista nom só necessário, mas imprescindível para melhorar as condiçons e a situaçom laboral de todas as operárias de esta empresa.
Nestes momentos estamos em reunions com os representantes da patronal da nossa empresa para melhorar a situaçom salarial e atingir aumento de salário, 900 euros. O salário que recebemos actualmente é muito baixo, 750 euros. Já levamos dous anos luitando para melhorar as condiçons, mas os patrons só procuram o seu máximo benefício, sem ter em conta a qualidade de vida e dignidade das operárias.

- Para mudar a vossa situaçom estades em contacto com os patrons ou com seus representantes?

Com os patrons directamente nom negociamos, só com os seus representantes na empresa… talvez saibam da exploraçom à que nos mantenhem e é preferível manter distáncias.

- Som muitos os Riscos Laborais aos que estades expostas?

Som. Tantas horas continuadas, sem mais descanso que um quarto de hora, dam lugar a problemas de fatiga que podem provocar a perda da atençom e trazer consigo acidentes laborais, esforços ao fazerem o mesmo movimento repetidas vezes que dam lugar a tendinites, problemas lombares, dores de cabeça... Ainda que se nos proporciona roupa para o frio, as temperaturas também som mui baixas e isso da lugar com o passo do tempo a problemas de reumatismo, artrite ou artrose…

segunda-feira, 8 de março de 2010

8 de Março Dia Internacional da Mulher Trabalhadora

Quem propujo a comemoraçom de um dia dedicado à mulher trabalhadora?

Foi Clara Zetkin durante a II Conferência Internacional das mulheres socialistas em 1910, para luitar polo direito ao voto, o direito ao trabalho e contra a discriminaçom, sem determinar um dia concreto.

A primeira vez que se celebrou este dia em Europa foi 19 de Março de 1911, data proposta por Alexandra Kollontai. Ao longo dos anos seguintes fôrom realizando-se comemoraçons em diferentes paises e em datas que nom sempre coincidiam, ainda que sempre tendo como referência o mês de Março.

História sobre da celebraçom deste dia e qual foi a razom de eligir 8 de Março.

O periodo que vai desde finais do S. XIX a princípios do XX, foi umha época de luitas, de greves, manifestaçons polas condiçons laborais e salariais das trabalhadoras/es, que eram inumanas, ainda que as mulheres nom reclamavam entom a igualdade salarial. Mas estas eram o sector mais oprimido e explorado polos patrons polo que nom duvidarom em somar-se à luita por melhorar a sua existência.

Quase todas as celebraçons deste dia durante a segunda década do S. XX realizarom-se ao redor do mês de Março, seguindo umha série de acontecimentos: greves, manifestaçons, acçons de protesto na rua e outras.

Um momento importante a resenhar é o ano 1917, em Rússia, neste 8 de Março, as mulheres operárias iniciárom umha greve com manifestaçons, saíndo às ruas pedindo pam, paz e liberdade, polas condiçons de miséria à que estavam a serem submetidas.

É um feito importante na nossa história, já que estas mulheres marcariam umha das primeiras fases da Revoluçom russa.
É a partir do ano 1922 que se instaura definitivamente esta data do 8 de Março e se espalha desde aqui a outros paises.

Já nos últimos anos da década dos 20 desapareceu esta data do calendário polo ascenso do nazismo e fascismo e posterior Guerra Mundial, e nom seria até os anos 60 que se recupera vinculado aos movimentos feministas e à luita por atingir igualdades salariais.

Quais som as nossas reivindicaçons para este dia?

No ámbito laboral existe a discriminaçom por sermos mulheres e por sermos trabalhadoras com umha dupla jornada laboral, nos centros de trabalho e no fogar. Queremos atingir a igualdade salarial com o homem, na procura dum salário e dumhas condiçons e relaçons laborais que permitam desenvolver-nos com os critérios ajeitados de dignidade e óptima qualidade de vida.

Também queremos lembrar a todas aquelas mulheres que luitarom por conquistar uns direitos que nos pertencem e polo que muitas fôrom reprimidas, encarceradas, maltratadas e até assassinadas. É um dia de lembrança, mas também de reflexiom de como devemos avançar na nossa luita para atingir a igualdade real de direitos e contra a opressom e exploraçom que nos impom esta sociedade machista e este sistema capitalista.

Têm sentido a dia de hoje continuar a celebrar este dia?

Hoje mais que nunca é necessário continuar a reivindicar e luitar polos nossos direitos sociais e laborais. As mulheres hoje em dia, com a crise e ocaso do capitalismo estamos a serem as mais afectadas polos recortes que impôm os patrons. As diferenças e discriminaçons laborais e salariais som cada dia mais evidentes.

Deste jeito a diferença salarial da mulher trabalhadora da Galiza é superior a um 25%, com respeito ao homem, cobrando um 74,5% do que cobram os homens. Os trabalhos som em precário e as condiçons laborais estam-se a deteriorar cada dia mais polos efectos desta crise causada por um sistema injusto que nos oprime, marginaliza e agrede impedindo a nossa libertaçom.

Condado, 8 de Março de 2010

domingo, 7 de março de 2010

8 de Março todos os dias























O Dia Internacional da Mulher Trabalhadora deste ano é especial porque há um século foi instaurada a data na II Conferência Internacional das Mulheres Socialistas seguindo a proposta da comunista alemá Clara Zetkin.
A AMC comemora esta efeméride com umha exposiçom que se inaugurou sábado 6 de Março na feira de Ponte Areias onde se recolhem oito entrevistas a oito vizinhas do Condado e que percorrera diferentes lugares da comarca dos que informaremos mais adiante.
Durante a manhá do sábado foi distribuido o manifesto que elaboramos para esta ocassiom. Nos dias prévios a AMC reivindicou na rua esta data de luita para a libertaçom da mulher.

terça-feira, 1 de dezembro de 2009

Acçom unitária do feminismo galego



Sábado 28 de Novembro saia às ruas de Compostela a Rede Feminista Galega na sua primeira acçom pública. O motivo, umha das vindicaçons históricas das feministas: 25 Novembro, dia internacional contra o terrorismo machista.

A Assembleia de Mulheres do Condado decidimos este ano juntarmos forças com diferentes organizaçons e mulheres feministas do país, pois ainda que nom esquecemos a nossa luita no Condado achamos que é necessária a uniom para fazer-nos ouvir.
Umha cadeia de perto de 60 mulheres com cartazes alusivos às violências que diariamente sofremos e um outro grupo "armado" de sachos e fouces acompanhados com pandeiros e pandeiretas denunciárom na rua a violência machista.

A continuaçom reproducimos o texto distribuido.

Dia contra a violência machista

Passar dum “cala” ou dum “tu nom sabes de que estás a falar” a umha agressom física, é só um degrau na escalada da violência machista que, muitas vezes, passa despercebido.
Porque as mortes nom se produzem de súpeto, porque antes de umha mulher ser assassinada produzem-se pequenas mortes todos os dias:

a morte nas escolas: silenciando o papel da mulher na história…

a morte laboral: quando continuamos a cobrar menos polo mesmo trabalho…
a morte na família: educando-nos no eterno papel de cuidadoras, como maes, esposas ou filhas…
a morte sexual: negando-nos o nosso próprio prazer, convertendo-nos em meros objectos reprodutores…

a morte a partir dos fundamentalismos religiosos: quando todos e cada um dos seus credos subordinam as mulheres ao homem…
Por iso estamos hoje na rua, por todas essas pequenas grandes mortes, por todas as mulheres assassinadas, porque já estamos fartas!!!!